世盃爭標熱門之一嘅葡萄牙，今晚喺主場與智利「拍跳」。葡萄牙為催谷狀態一定狂攻，智利初段例多失誤，隨時半場都難頂，葡軍半場勝有計。（Now 630及618周日凌晨1時45分直播）文:法達斯維
智利初段多失波
葡萄牙會喺主場接連與智利及尼日利亞「拍跳」，先至出征美洲，之後唔會再安排熱身賽，直接出戰世盃首輪對剛果民主共和國。葡軍除咗第6度征戰世盃嘅C朗外，仲有英超單季助攻王般奴費南迪斯、老將貝拿度施華，以及應屆歐聯盟主巴黎聖日耳門3寶紐奴文迪斯、祖奧尼維斯及域天拿助陣，主帥馬天尼斯希望盡快提升眾將狀態，迎接世盃頻密賽程。
另邊廂，無緣世盃嘅智利處於重建階段，阿歷斯山齊士、維達爾等老將已經名落孫山，雖然各項賽事近5仗獲4勝1負，但對手只係新西蘭、佛得角、秘魯之流，而且呢5仗中竟有4次上半場落後，凸顯佢哋初段集中力唔夠問題。加上葡萄牙近4次主場有3次半場領先，必搵智利祭旗振士氣，半場主勝咪錯過。
