今晚英足盃第3圈焦點之戰，曼聯主場同白禮頓爭晉級。「紅魔鬼」上仗由臨時主帥費查首次領軍，結果一樣贏唔到，已連續3場打和。事實上費查教波經驗尚淺，唔好奢望隊波會即時反彈；白禮頓上場打和曼城，表現非常硬淨，以曼聯近6場僅1勝頹勢，冇讓波本錢，白禮頓受讓半一下盤抵玩。（Now 651周一凌晨零時30分直播）文:Mic少
曼聯炒咗領隊魯賓艾摩廉後，搵嚟U18教練查費暫時帶隊，呢位名宿聽晒高層話，改用番4後衞陣式，但防線表現唔見改善，上場對般尼都失兩粒，好彩前鋒班捷文施斯高忽然發威，打破3個月入球荒，梅開二度幫球隊打和2比2，但要靠呢啲神經刀打救，始終唔係辦法。曼聯更大問題係後防不穩，近14場僅1場冇失波，最離譜係主場被英超包尾大幡狼隊逼和1比1。費查透露今仗或派哈利馬古尼上陣，呢位中堅缺陣達2個月，狀態成疑，隨時成為「計時炸彈」。
白禮頓近況回勇
作客嘅白禮頓雖然近8場僅1勝，但近期表現慢慢見好轉，以2比0擊敗般尼之後，上場作客曼城，落後下都可以逼和1比1。強如英超2哥都贏唔到白禮頓，更何況處於弱勢嘅曼聯。睇番白禮頓近4次作客奧脫福獲3勝1負，往績佔優，受讓確實抵玩。
